გონსალო იგუაინი და კრიშტიანუ რონალდუ, შედეგიანობის მხრივ, რეკორდებს ამხობენ – ლა ლიგის პირველ 8 მატჩში, მათ ანგარიშზე 19 გატანილი გოლია!

ეს ამ ეტაპზე ყველაზე შედეგიანი წყვილია "რეალის" ისტორიაში (და ამ სეზონში). ისეთ ფორვარდებს, როგორებიც დი სტეფანო და პუშკაში იყვნენ, 1958–59 წლების სეზონში, ამ დროისთვის 16 გოლი ჰქონდათ გატანილი, იმდენივე, რამდენიც მომდევნო სეზონში პუშკაშმა და ხენტომ გაიტანეს. პაინიომ და ნარომ 1950–51 წლების სეზონში, ერთით მეტი – 17 გოლის გატანა შეძლეს. იგივე შედეგს მიაღწიეს პრუდენმა და ბარინაგამ 1946–47 წლებში, ხოლო ოლივეირასმა და რეგეირომ 1932–33 წლების სეზონში.

კრიშტიანუ რონალდუ გუნდის საუკეთესო ბომბარდირია. მის ანგარიშზე 10 გატანილი გოლია და მხოლოდ ერთი გოლი აკლია, რათა მე–100 გოლი გაიტანოს "რეალის" ოფიციალურ მატჩებში. გონსალო იგუაინმა 9 გოლის გატანა შეძლო. შაბათს მან არ დაინდო თავისი საყვარელი მსხვერპლი "მალაგა", რომლის წინააღმდეგაც 5 მატჩში 8 გოლი აქვს გატანილი.

ასევე "რეალმა" ბოლო 4 მატჩში, ზედიზედ 4 გოლის გატანა შეძლო. "სამეფო კლუბის" მსხვერპლები "ესპანიოლი", "ბეტისი", "რაიო" და "მალაგა" გახდნენ.


ინფორმაციის წყარო: Marca.com

ავტორი - Faqo Oo